Сар шинийн өдрүүдэд цагдаагийн байгууллагаас хэрхэн ажиллах талаар мэдээлэл өглөө.

Цагдаагийн дэд хурандаа Г.Гүррагчаа” Сар шинийн амралтын өдрүүдийг тэмдэглэн өнгөрүүлэхтэй холбоотойгоор цагдаагийн байгууллага 2025 оны хоёрдугаар сарын 28-ний өдрөөс өндөржүүлсэн бэлэн байдлын нэгдүгээр зэрэгт шилжин ажиллана. Улсын хэмжээнд 130 орчим хийд шинийн 15-ны өдрийг дуустал ном хурна. Мөн шинийн өглөө иргэд зорин очиж нар хардаг 250 орчим өндөрлөг цэгт хөдөлгөөн зохицуулахаар бэлтгэл ажлыг хангасан. Түүнчлэн улсын хэмжээнд авто эргүүлийн чиглэлээр 140 чиглэлд 780 албан хаагч ажиллахаас Улаанбаатар хотод 100 чиглэлд авто эргүүлийн үүрэг гүйцэтгэнэ. Ингэхдээ үндсэн хуваарьт томилгоотой алба хаагчдаас гадна 5416 алба хаагч нэмэлтээр үүрэг гүйцэтгэнэ” гэв.

ТЦА-ны УСХ-ийн дарга, цагдаагийн дэд хурандаа Д.Оюун” Цагдаагийн байгууллагаас энэ оны хоёрдугаар сарын 28-ны өдрөөс гуравдугаар сарын 05-ны өдрийн хооронд нийслэл хотод 1230, орон нутагт 803 нийт 2033 алба хаагч гудамж замд хөдөлгөөн зохицуулалт, хяналт шалгалт хийж ажиллана. Баяр амралтын өдрүүдэд хамгаалалт зохицуулалт хэвийн явагдана. Орон нутгийн замыг бүсчилсэн байдлаар хувааж 100 км тутамд пост ажиллуулна. Өнөөдөр оройн 20:00 цагт тэгш, сондгойгоор зорчих тээврийн хэрэглэлийн зохицуулалт дуусгавар болж байгаа. Харин маргааш тээврийн хэрэгслийн улсын дугаарын арын орон тооны зохицуулалт буюу  0,5 дугаараар төгссөн тээврийн хэрэгсэл хөдөлгөөнд оролцохгүй. Сар шинийн өдрүүдэд дугаарын хязгаарлалт үйлчлэхгүй. Жолооч нар орон нутгийн замд хөдөлгөөнд оролцохдоо хурдаа тохируулж хөдөлгөөнд оролцох, архи согтууруулах ундааны зүйл хэрэглэсэн үедээ тээврийн хэрэгсэл жолоодохгүй байхыг анхааруулж байна” гэлээ.