Хамгийн эргэн төлөлт өндөртэй, тухайн өрх айл, хувь хүнийг хариуцлагатай болгодог зээл бол ипотек. Өмнөх жилүүдэд ипотекийн зээлийн чанаргүй гэсэн ангилалд багтах нь банкны байж болох үзүүлэлтээс давж байгаагүй.

Гэтэл энэ оны нэгдүгээр сарын байдлаар ипотекийн зээлийн үлдэгдэл 9.5 их наяд төгрөг байгаа нь өмнөх оны мөн үеэс 18.9 хувиар өссөн үзүүлэлттэй байгааг Монголбанкнаас мэдээллээ.

Тайлант хугацаанд нийт 1,283 хүн шинээр ипотекийн зээлд хамрагдсан нь өнгөрсөн оны мөн үетэй ойролцоо байгаа юм.

Нийт зээлийн 20 хувийг орон сууцны ипотекийн санхүүжилтээр олгосон бол 34.7 хувийг арилжааны банкнуудын эх үүсвэрээр олгожээ.

Хугацаа хэтэрсэн болон чанаргүй зээлийн ангилалд шилжсэн зээлийн хэмжээг өмнөх оны нэгдүгээр сартай харьцуулахад 26.3 хувиар нэмэгдэж, 1 тэрбум төгрөг давсан байна.

Энэ статистик нь  иргэдийн худалдан авах чадвар суларч, байнга тогтмол, хариуцлагатай төлж ирсэн байрны зээлээ төлж чадахгүйд хүрч байгааг харуулж байна.

Үүнээс гадна барьцаа хөрөнгө шаардахгүйгээр бүх төрлийн барааг лизингээр авдаг болсон. Их олон газраас зээлээр бараа худалдан авах нь орлого, зарлагаа хянаж чадахгүй байдалд хүргэхэд тодорхой хэмжээгээр нөлөөлж байгаа.

Нэг хүн зээлийн олон аппликейшний хэрэглэгч болсон. Давхар зээлтэй иргэдийн тоо байнга өсөлттэй байгаа. ББСБ-ын нийт аквив жил дараалан өсч байгаа гээд банк, санхүүгийн салбарт анхаарах асуудал үүсч байна.

Энд нэмэлт мэдээлэл өгөхөд, ипотекийн зээлийн хүү хамгийн ихдээ 14 хувь байх журам батлагдаж иргэний авах орон сууц нь хотын төвд байршилтай бол зээлийн хүү өндөр буюу 14 хувь хүртэл, харин хотын зах руу байх тусмаа хүү буурч, 6 хувь хүртэл байхаар тооцож, журмыг боловсруулжээ.

Энэ асуудлыг өнгөрсөн намраас эхлэн ярьсан. Засгийн газраас эцсийн шийдийг гаргана.