Энэ сарын 16-22-ны өдрүүдэд Нийслэлийн ЗДТГ, Нийслэлийн Соёл Урлагийн Газар, Монголын Урлагийн Зөвлөл болон Монголын Үндэсний Кино Урлагийн Зөвлөл хамтран 16 дахь удаагийн “Улаанбаатар” олон улсын кино наадмыг зохион байгуулах гэж байна. Өдгөө 16 дахь удаагаа зохион байгуулагдаж буй тус наадам нь Алтан хальс ТББ-тай хамтран “Залуу үзэгч” тусгай хөтөлбөрийг санаачлан үзэгчдэд бэлэг барьж байна. Тус хөтөлбөрт АНУ, Монгол, Франц зэрэг улсуудын 4 киног 2024.10.19-20-ны өдрүүдэд Синема Нэкст кино театрт үнэ төлбөргүйгээр үзэгчдэд толилуулахаар бэлтгэлээ.

“Улаанбаатар” олон улсын кино наадам нь нээлтийн кино болон Монгол кино хөтөлбөрийн бүтээлүүдийг уран бүтээлчдийн дунд нээлттэй уралдаан зарлаж, сонгон  шалгаруулдаг уламжлалтай бөгөөд наадамд бүтээлээ ирүүлсэн нийт уран бүтээлчдээс 13 төрлөөр шилдэгүүдийг тодруулдаг ба шилдэг уран бүтээлчдийн нэрс 2024.10.16-ны өдөр наадмын нээлтийн ёслолын үеэр тодрох болно.

Түүнчлэн наадмын “Монгол кино хөтөлбөр”-өөр найруулагч С.Баттулгын “Өмнөдийг зорих замд”, Г.Бямбасүрэнгийн “Хувь заяа”, Б. Ганболдын “Пагмадулам” бүтээлүүдийг сонгож үзүүлэхээр болжээ. Эл сонгогдсон бүтээлүүдийг аравдугаар сарын 17-нд олны хүртээл болгох аж.