Улаанбаатар хотын авто замын түгжрэлийг бууруулах үндэсний хорооны дарга, УИХ-ын гишүүн, сайд Ж.Сүхбаатар хотын түгжрэлийг бууруулахад авч буй арга хэмжээ, бодлогын талаар өчигдөр Төрийн ордонд танилцуулав.

Энэ үеэр автомашины тэгш, сондгой дугаарын хязгаарлалтыг цаашдаа яаж зохицуулах талаар мэдээлэл өглөө.

Тэрбээр “Цаашдаа дугаарын хязгаарлалтыг есдүгээр сард тэгш, сондгой гэж шийдэх нь боломжгүй гэсэн байр суурьтай байгаа. Урьд нь бидэнд ямар ч сонголт байгаагүй.

Ирэх оны энэ үед үндсэн замууд дээр нэгдүгээр эгнээ гаргах, автобус явуулах хоёр асуудал шийдэгдсэн байна. Ийм тохиолдолд дугаарын хязгаарлалт хийхгүй.Үндсэндээ дугаарын хязгаарлалтыг цуцлахаас өөр арга байхгүй.

Би холбогдох албаныханд 20 хоногт дугаарын хязгаарлалтад өртөж буй өдрүүдээр нь татварын хэмжээг бууруулах ёстойг сануулсан” хэмээн ярив.