Засгийн газраас өнгөрөгч долоо хоногт ажлын хэсэг гаргаж, Монголд цахим мөрийтэй тоглоомын чиглэлээр үйл ажиллагаа явуулж буй зарим вэбсайт болон сувгуудыг хаах ажлыг эхлүүлээд байгаа билээ. Тэгвэл өчигдрийн байдлаар 1xbet цахим мөрийтэй тоглоом сурталчилсан, адил төстэй байдлаар үйл ажиллагаа явуулдаг 34 домэйн хаягийг Харилцаа холбооны зохицуулах хорооноос хаажээ. Мөн 100 гаруй “Фейсбүүк” хаяг, группүүдийг хаалгах хүсэлтийг “Mета” компани руу илгээсэн байна. Түүнчлэн Монголын арилжааны банкуудтай хамтарч мөрийтэй тоглоомын үйлчилгээний дансыг царцаах, үүрэн телефоны оператор компаниудтай хамтарч 1xbet болон бусад мөрийтэй тоглоомд утасны дугаараар бүртгүүлдгийг болиулах, урлаг соёл, спорт, олны танилуудын сурталчилгааг зогсоох арга хэмжээнүүдийг авах ажээ. Засгийн газрын хэрэг эрхлэх газрын дарга Н.Учрал энэ талаар “Монголчуудын амьдралыг сүйрүүлж, эдийн засагт сөрөг нөлөө үзүүлж жил бүр ОХУ-руу 500 сая доллар урсгаж буй 1xbet сурталчилдаг хаягуудыг шат дараатайгаар хаана. Ойрын хугацаанд ажлын хэсэг шуурхай ажиллаж байна”  хэмээн цахим хуудсандаа бичжээ.

эх сурвалж: newspress.mn