Үндэсний баяр наадмын тухай хуулиар улсын наадмын шөвгийн 32 бөхөөс допингийн шинжилгээ авдаг байсан бол ирэх жилээс 21 аймгийн баяр наадмын шөвгийн дөрвөн бөхийг допингийн шинжилгээнд хамруулахаар болж байна. Иймд тухайн допингийн хариу мэдээллийг цаг тухайд нь олон нийтэд мэдээлэх, цаг алдахгүй зарладаг асуудлыг дүрэм журамдаа тусган нийцүүлэх нь чухал гэдгийг Үндэсний баяр наадмыг зохион байгуулах хорооны дарга С.Амарсайхан онцолсон.

Мөн Үндэсний их баяр наадмын хурдан морины сэрвээний өндөр хэмжих болон телевизийн шууд дамжуулалтыг шинэлэг байдлаар зохион байгуулах, Наадмын нээлт, хаалтын үеэр гарсан алдаа дутагдалыг давтахгүй байж наадмын нээлтийн арга хэмжээний утга агуулгыг улам төгөлдөржүүлж, төрийн хүндэтгэлийн концертын найруулга, хэлбэр агуулгад онцгой анхаарах шаардлагатайг тодотгоод дараах үүрэг өглөө.

Үүнд:

•  Үндэсний их баяр наадмаар цолны болзол хангасан уяач, харваачдын мэдээллийг нэгтгэн ирэх оны нэгдүгээр сарын 15-аас өмнө Үндэсний хороонд танилцуулах;
• 2025 оны Үндэсний их баяр наадмын бэлтгэл ажлыг хангах, зохион байгуулалтыг хийх, төсөв төлөвлөгөөг боловсруулж танилцуулах;
• Тулгар төрийн 2234, Их Монгол улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойн үндэсний их баяр наадмын Төрийн хүндэтгэлийн концерт, нээлт, хаалтын арга хэмжээний найруулагч (найруулагчийн баг) сонгон шалгаруулах ажлыг шуурхай зохион байгуулж танилцуулах;
• Үндэсний их баяр наадмын нээлтийг иргэд олон нийт, гадаад дотоодын жуулчдад хүртээмжтэй хүргэх хүрээнд баяр наадмын нээлт, хаалтын тоглолтыг давтан үзүүлэх ажлын бэлтгэлийг хангах;
• Үндэсний их баяр наадмын салбар хороодын бүрэлдэхүүнд эрхэлж байгаа албан тушаалын чиг үүрэгтэй холбоотой өөрчлөлт оруулах асуудлыг Үндэсний их баяр наадмын хороонд танилцуулах;

Түүнчлэн 2024 оны Үндэсний их баяр наадмыг зохион байгуулах үеэр гаргасан алдаа дутагдал, зөрчлүүдийг дахин давтахгүй анхаарч ажиллахыг үүрэг болголоо.

Эх сурвалж: newspress.mn